الجمعة، 19 فبراير، 2010

باقة ورد وامتنان

بسم الله الرحمن الرحيم

الأخوات والأخوة مدونيين ومدونات

باقة ورد وامتنان أهديها لكم لأعبر عن شكري للجميع سواء من أرسل لي تعليق على 

المدونة أو من هاتفني على موبايلي أو أرسل لي ماسيج 



الأيام اللي فاتت عدت عليا والحمدلله على خير ...ضغطي نزل

ل70-40

وداه على فكرة مش بطال علشان قبل كده كان 60-20

وطبيب القلب قالي إن عندي بعد الشر عنكم

neurocardio genic syncope

حاجه فظيعه مش كده؟؟ وطبعا هو تفضل وكتب الإسم بخط 

هيروغليفي 

وصورت الروشته بتاعته و أرسلتها لإبنة لي في الله صيدلانية

وربي يكرمها قرت الخرابيش بتاعته وفهمتني إن عندي الدم 

بتاعي الظاهر تقيل 

بينزل القدمين في دورته ومش بيطلع تاني للقلب والضغط بينزل

 فالقلب يعمل إيه؟


يقوم القلب يزود ضرباته علشان يجبر الدم يطلعله قوم إيه؟؟؟؟؟؟

العصب السمبثاوي واللاسمبثاوي يحسب القلب بيدق بسرعه

 علشان الضغط عالى

يقوموا يدوا أمر للمخ ويقولوله : إلحق الست ضغطها عالي

مخي التعبان يقوم منزله وبدل ما يبقى ضغطي واطي بيبقى واطي 

واطي واطي



يعني الموضوع يضحك حتى عقلي وقلبي مش عارفين 

يتفقوا؟؟؟؟؟؟؟؟؟؟؟؟؟؟؟؟؟؟؟

وكانت النتيجة إني كل ما اقف اقع



وأمرني الطبيب بارتداء جورب ضاغط ورفع رجلي فوق

 و راسي تحت 







داه كلام يا ناس؟؟

وقال إيه ممنوع الوقوف تماما

ممنوع ازاي يعني ومين يربي البنين هو مثلا؟؟؟


المهم الحمدلله أساسا أنا كنت شبه مغمن عليا وتقريبا كنت باوفر

 طاقتي للقرآن والصلاة طالما مافيش طاقة خالص

 

ومرت الايام الحمدلله وكنت بادخل يادوب ابص على تعليقاتكم

 واشكر ربي إني عندي أحلى صحبة في الدنيا


وبدأت أحارب علشان أقدر أقوم وخاصة إن المدارس والجامعات 

خلاص فاضل لهم يومين




بجد ألف حمد وشكر لله لكم جميعا حقيقي رفعتم من روحي 

المعدنية و أسعدتم قلبي ربي يسعد قلوبكم كلكم




كان نفسي بصراحة أرد عليكم كلكم فردا فردا وبعدين قلت أرد في

 مدونة خفيفة سريعة و أزوركم في مدوناتكم إن شاء الله 


بس اصبروا عليا متستعجلوش علشان أول ما احس بإرهاق

 حارتاح زي ما الطبيب قال

تسلمولي يارب و أشوفكم دايما أحلى صحبة





********************

على الهامش كده وبسرعه أسطر لكم ما قرأته في الجرائد 

.اعمل إيه بقى 


قرأت خبر اسعدني

مجلس الشعب يوافق على مشروع قانون نقل وزراعة الأعضاء

ياريت بقى الاقي اللي يساعدني ازاي اخلي نفسي  

في حالة وفاتي اتبرع بأعضائي؟

بيتهيألي بدراوي حيساعدنا في الموضوع داه


ومن مدونة حنان وردة 

حبيت انقل لكم الملف الخاص بالتبرع بالأعضاء 

و ايضا شاهدت هذا الملف و أحببت أن أهديه لكم


**********************

خبرين تلاته نقطوني بجد

*تشغيل بواخر منتهية الصلاحية بين مصر والسعودية

يارب الصبر احنا لسه حنتحمل غرق عبارات.؟؟؟


*نظيف: النقاب يلغي شخصية المرأة

النقاب اللي بيلغيها مش العري والإبتذال؟

إنا لله و إنا إليه راجعون

وكمان كل واحد حيدلو بدلوه في النقاب؟؟؟؟؟؟؟؟

كان نفسي اتكلم كمان عن الغاز بس مش حاقدر أصلي لما باتنرفز

 ضغطي بيوطى زيادة

والبوست داه أساسا ليكم ومش عايزة أعكنن عليكم 

وفي الآخر أكرر تاني شكري لكم وربي يبارك فيكم


اسأل الله أن يجعل لقاؤنا في الجنة


ساهم في نشر الموضوع و لك جزيل الشكر!



Digg Technorati del.icio.us Stumbleupon Reddit Facebook Twitter

احصل على هذه الإضافة

هناك 40 تعليقًا:

Mona يقول...

نو لما تعرفى توصلى لموضوع التبرع بالاعضاء أبقى قولى لى علشان أنا عاوزة أعمل كده لو أعضائى كانت حتصلح لشىء عند الوفاة:) أنا مش بهزر على فكرة - وسلامتك ألف سلامة وترجعى بألف سلامة ومنورة وشفاكى الله وعفاكى يارب - وعلى الهمة وحتبقى زى الفل أن شاءالله والحمدلله على كل أبتلاء -

SHAPE YOUR LIFE (ABOALI) يقول...

اتم الله شفاءك و تمتعينا بم هو خير دائما

ياااااااااااااارب

أمل حمدي يقول...

ألف حمد الله على سلامتك ياست الكل
ربنا يبارك فيكِ وفي عمرك اللهم أمين

سبايدرمان spiderman يقول...

حمد الله على سلامتك والف مليون سلامه عليكي
و ادام ضغطك واطي كلي مخلل و طرشي و زودي الملح في الاكل شويه
ربنا يشفيكي ان شاء الله

mohamed ghalia يقول...

الف مليون سلامة ياماما
نورتى بيتك من جديد

salma mohamed يقول...

الف مليون سلامه لخالتو
دم تقيل ايه بس يا خالتو الاكسبريشن ده مغلوط
اكيد هما يقصدوا يقولوا ان دم حضرتك شربات مركز شويه زي شربات الكنافه كده :)
ربنا يعجلك بالافيه ويتم شفاكِ على خير ويجعله كفاره وطهور.

د/عرفه يقول...

الف سلامة عليكى

ويارب دايما تكونى بافضل صحة وحال

كلمات من نور يقول...

مــنى

أنا عارفه إنك مش بتهزري ولا أنا كمان ..في انتظار من يكتب عن هذا الموضوع ويفيدنا سريعا ........تسلميلي يارب ..الحمدلله والله بشد الهمة و اعليها وربي يعافينا من كل سوء..


أبو علي

تسلم إيديك يارب على سؤالك عني وربي يديم علينا نعمة الصحة ويديم علينا نعمة التواصل لله ...


أمولة

نورتيني يا ستي وربي يبارك لك ويجزاكي الخير على سؤالك عني و أسال الله أن يمتعنا بهذه الصحبة الصالحة دائما ...


سبايدرمان

المخلل والطرشي مش حل علشان بقالي شهرين تلاته بالمخلل والملح والكورتيزون وقربت ابقى شبه البالون المنفوخ وطبيبة العلاج الطبيعي لو شافتني حاتموتني وتأكلني مياه بس لمدة شهرين... (:
شكرا على سؤالك عني


محمد يا غالي

سلمك الله يا ولدي من كل سوء...بيتي منور بضيوفه ..ربي يجمعنا في جناته إن شاء الله...

سلومة يا قمر

مش الدكتور اللي قال دمي تقيل يا قمر أنا اللي باغلس واعاكسه يمكن يختشي ويطلع من رجليا يرجع لقلبي راضخا ...هههههه



نورتوني جميعا

كلمات من نور يقول...

د. عرفة

الله يسلمك يا بني من كل سوء ..نورتني

جنّي يقول...

السلام عليكم

شفاكي الله وعافاكي ومتعك بالصحة والعافية .. طهور ان شاء الله ..

بالنسبة للخبر السعيد فالقانون به بعض النقاط المختلف عليها مثل ازالة الاجهزة من مرضى جذع المخ .. المهم التطبيق واحنا تعودنا من الحكومة الفساد الكبير ..

اما قولهم عن النقاب فاللدين رب يحميه ..

جزاكي الله خيرا

طارق سليم يقول...

السلام عليكم ورحمة الله وبركاته :
الحقيقة انا محرج جدا من حضرتك ومش هاسامح نفسى ابدا على تقصيرى معاكى فى السؤال والاطمئنان ، حقيقى انا فعلا بقالى مدة كبيرة مشغول قوى لشوشتى لدرجة انى بدخل النت تخاطيف والزحمة دى فى الشغل كانوا بيقولوا انها هتخف من تلات شهور لكن يظهر كدة انها مش هتخف خالص خالص فى القريب العاجل .
عموما ياريت حضرتك تسامحينى والا انا اللى مش هاسامح نفسى ابدا ، والف مليووووون سلامة عليكى ، انا اول ماقريت المصطلح ده قومت من قلقى سالت اخويا محمود يشرحلى الحكاية ايه بالظبط ، وياريت فعلا حضرتك ما تجهديش نفسك خالص وكلام الطبيب لازم يتسمع ويتنفذ لانه فعلا ماينفعش حضرتك تقفى لفترات طويلة ولا حتى قصيرة ولازم تمارسى بعض الحركات الرياضية الخفيفة وتكترى من السوائل والعصائر وخصوصا
( الزنجبيل ) على الريق كل يوم عن تجربة والله ، انا فعلا قلقان قوى على حضرتك وارجوا من الله سبحانه وتعالى ان يتتم شفاءك ويرزقك بالخير كله آجله وعاجلة الهم امين .

موناليزا يقول...

حمدا الله على السلامة ياقمرى
:) نورتي عالم التدوين كله
ان شاء الله تخفى بسرعة وتبقى أحسن من لاول كمان

Sonnet يقول...

ألف سلامة يا قمر
الموضوع اللي عندك ده بسيط جدا
ما تخافي
كل ما كتبه الطبيب فقط لتنظيم الدورة الدموية لأن هناك متلازمة بين القلب و الاعصاب تحتاج لعلاج بسيط و ليس مرضا عضويا
و ما طلبه من تقليل الوقوف لفترات مع تحريك القدم لضمان سير الدورة الدموية و رفع القدم خاصة نهاية اليوم و طوال الجلوس على شيء مرتفع مثل الكرسي او وسادة درجة 15 درجة مثل ما نطلبه مثلا من مرضى الدوالي بالضبط
اما موضوع الاعصاب و خلافه فلا تعيريه اهتماما
انصحك للاطمئنان بعمل موجات على القلب فقط مجرد عمل روتيني
و لا تقلقي
مع تحياتي و مدودتي

القمرالباكي يقول...

السلام عليكم

انا جديده فالتدوين وجات مدونتك قصادي لسه مقرأتش فيها بس حبيت اقولك الف سلامه عليكي وربنا يشفيكي انتي وكل المسلمين

دومتي بخير

مجداوية يقول...

السلام عليكم

الحمد لله على سلامتك أتم الله شفاكِ وأحسن علاج للضغط المنخفض قراءة الجرائد القومية بالتحديد بس بلاش على طول عشان الضغط ميرتفعش بشكل خطر

:)

وألف شكر لله على سلامتك

كلمات من نور يقول...

جنى

أهلا أهلا المدونة زادت نور والله بوجودك ...موضوع التبرع اكيد فيه مشاكل كبيرة و سلبيات بس أنا باصه للغيجابيات بتاعته ونفسي اتبرع بأعضائي في حالة موتي وعايزة أعرف اوصل للموضوع داه ازاي...تحياتي


طارق سليم

متقولش كده ابدا والله مافيش أي زعل بيننا وبين بعض ...أنا أساسا بادخل وامر مرور سريع علشان لغاية النهاردة ومع الجورب والملح والحوادق وادوية الضغط ضغطي كان من نصف ساعه 60-30
حاجه عيب قوي بجد ...هههههه ..دعواتكم بجد محتاجه دعوات كتيرة كتيرة ....


موناليزتي يا جميلة

ادعيلي كتير كتير قادر كريم ربي يخفف عني ويجعله في ميزان حسناتي ومكفرات لذنوبي....


سونيتي

عملت كل النصايح دي يا قمر وفوجئت بضغطي 60-30 ..باعمل ايكو كل سنة علشان أنا عندي سكوليوزيز والميل ناحية القلب وكويس جدا ..رسم القلب تمام ..و كمان انزيم القلب حلو ...ومش عارفه بقى شكلي حاعمل تمرين اليوجا اللي في البوست ...ههههه


القمر الباكي

أهلا وسهلا بك في مدونتي الحبيبة ..بيتي التانية و أتمنى دائم التواصل..


مجداوية

مع الأسف قراءة الجرائد بتزيد من انفعالي وضغطي بدل ما بيعلى بيوطى اكتر ومش عارفه بقى اعمل ايه؟ شكلي حابتدي اتفرج على المسلسلات المصرية جايز تكون الحل ولو غني عارفه إنها بتجيب نسبة تخلف بس اهو محاولة ...ههههههه


نورتوني جميعا

مستكه يقول...

السلام عليكم ورحمة الله وبركاته

الف سلامة علي حضرتك

والله اول مره اعرف بتعب حضرتك ده

الف سلامة عليكي اسال الله ان يشفيكي شفاءا طهورا

ذو الوجه المبتسم يقول...

كل سنة وانتى طيبة
بمناسبة عيد الام
وربنا يعطيكى الصحة وطول العمر يا رب
واتمنى اشوفك دايما مبسوطة ومبتسمة

تحياتى لاجمل ام
ذو القلب المبتسم

نهــــــــــار يقول...

السلام عليكم...
ألف سلامه عليكي....
أجر وعافيه ...
وطهور أن شاء الله ...
........
النقاب فاقع مرارتهم ....
والحمدلله نسبة المنقبات في إزديايد...
....
في امان الله

حامد يقول...

جميل ..ولكل منا جزء مما قلت ..أما جميعها مجتمعه ..؟ فـ الحمد لله على السلامه.. وجعلت آلامك - لك عوضا بميزان حسناتك ..

طهر فؤادك يقول...

السلام عليكم ورحمة الله وبركاتة

الف سلامة عليكى واسف جدا جدا جدا جدا جدا والله النت كان بايظ من فترة ولسة داخل اليوم بالصدفة ولقيت موضوعك وعن تعبك والف سلامة عليكى وسامحينى ياااختى الكريمة لانى معرفش والله ....

ونسأل الله العظيم رب العرش العظيم ان يشفيك

ونسأل الله العظيم رب العرش العظيم ان يشفيك

ونسأل الله العظيم رب العرش العظيم ان يشفيك

امين يارب العالمين .. والحمد الله على كل حال ..

قال رسول الله صلى الله عليه وسلم : (ومن يتصبر يصبره الله، فما أعطي أحد عطاءً خيراً من الصبر) متفق عليه

اقصوصه يقول...

الحمدلله على سلامتك غاليتي

والله يشفيك يا رب

ويشفي كل مريض :)

عالم حبيب يقول...

رسول الله صلي الله عليه وسلم، كان إذا أتي مريضًا أو أتي به إليه، قال عليه الصلاة والسلام:
(أذهب البأس، رب الناس، اشف وأنت الشافي، لا شفاء إلا شفاؤك، شفاء لا يغادر سقمًا). (البخاري مع الفتح : حديث 5675).

حمد لله على سلامة حضرتك .. وربي يتمم شفاؤك على خير يارب .. جزاكِ الله خيراً على السؤال فترة غيابي .. اسأل الله أن يسعدك ويبارك لكِ في ذريتك

أ / أحمد عبد المنعم يقول...

بسم الله الرحمن الرحيم

الأخت الفاضلة : نور

حمدا لله على سلامتك
وشفاك الله من الضغط عاليه وواطيه وجعله وسطا 120 / 80 اللهم آمين

لم الضغط المنخفض ؟ ولم الضغط العالى ؟

نحن نعيش أزهى أوقات الزمان
فالكوسة متوفرة والباذنجان
وإللى مش عاجبه فيه ملوخية كمان

وكم ذا بمصر من المضحكات ولكنه ضحك كالبكا.

شراب الدوم
نعم شراب الدوم علاج لضبط الضغط حاولى استشارة طبيب لاستخدامه

سمو الامير يقول...

الف الف لا باس عليكي اختنا الكريمة

أجر وعافية ان شاء الله

ويارب تقومي بالسلامة

Sharm يقول...

الف الف سلامة

هكذا علمتني الحياة في ظل العقيده يقول...

أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك
أسأل الله العظيم رب العرش العظيم ان يشفيك

في كل بلاء يصيب المرء عافية *** إلا البلاء الذي يدني من النار

تأثير الفراشة يقول...

الف سلامة على حضرتك ، لا بأس عليك

أنا كنت متوقفة عن المتابعة قليلا الفترة السابقة فلم أعلم

ألف سلامة على حضرتك
شفاك الله و عافاك نسأل الله العظيم رب العرش العظيم أن يشفيك

بإذن الله تعودى فى أفضل حال

MOKHTAR يقول...

السلام عليكم ورحمة الله وبركاته،
شفاكي الله وعفاكي وأتم لك الشفاء على خير بإذنه تعالى.

معلش أنا مكنتش متواصل مع عالم التدوين من فترة طويلة لإنشغالي بشدة، فسامحيني إن كنت لم اعلق اثناء فترة مرضك السابقة.

وفكرة حلوة إنك كنت بتابعي الأخبار وضغطك منخفض، أظن دا أحسن حل لرف الضغط بالأوي... (:

كلمات من نور يقول...

مستكة

تسلميلي يا فتاتي الحلوة وربي يبارك فيكي على سؤالك الطيب...تحياتي


ذو الوجه والقلب المبتسم

شكرا ألف شكرا للكلمات الطيبة وعلى فكرة أنا أم طول السنة مش بس يوم عيد الام ...تحياتي


نهار

جزاك الله خيرا على سؤالك ..وربي يزيد من الإيمان في قلوبنا ويرد كيد الكائدين في نحورهم ...تحياتي


حامد

لا لا لكل واحد باقة ورد طبعا ..داه لو جزء يبقى كده حيحصل عراك وضؤب وخطف في المدونة ...ههههه...جزاك الله خيرا...تحياتي


طهر فؤادك

الحمدلله على نعم الله الكثيرة يا محمد ..والله إحنا في نعمه بس مش بناخد بالنا الا لما نمرض أو نزور عيادات الأطباء ونرى من هم في حال صعب من المرض ..والحمدلله على نعمة الصبر واللجوء إلى الله دائما و أبدا...ولا يهمك علشان معرفتش عن مرضي أنا اهو لسه مريضه ..هههه ...الحمدلله بس الضغط العجيب داه مش راضي يرتفع ...الحمدلله على كل حال...تحياتي


أقصوصتي

تسلميلي يا فتاتي ودعواتك لمرضى المسلمين آجمعين ..ربي يتقبل منك ..تحياتي


عالم حبيب

اخيرا نورتنا من جديد.؟ الحمدلله على السلامة يا بني ..ربي يبارك فيك ويهبك الحكمة بإذنه..يارب اشفي مرضى المسلمين ..آمين آمين آمين ...تحياتي


أستاذ أحمدعبد المنعم

أضحكني ما كتبت وهو كما قلت شر البلية ..وعلى فكرة أنا مش باكل الملوخية من و أنا طفلة عكس كل الأطفال ..وعلى فكرة كمان ذاكر كويس قبل ما تنصحني ..الدوم شربه يخفض الضغط مثله مثل الكركدية ...يعني لما يكون ضغطي 70-30 و أشرب دوم أروح فين؟؟؟؟؟؟؟؟؟؟؟ ههههه أضحك الله سنك..فين بوستاتك يا أستاذ أحمد؟تحياتي

سمو الأمير

ربي يبارك فيك يا فندم و يجعل حالك في سمو ورفعة دائما و أبدا ...تحياتي


شارم

سلمك الله من كل سوء يا أخي ورفع من مقامك و أدخلنا الجنة جميعا ..تحياتي


هكذا علمتني الحياة في ظل العقيده

ربي يعافينا من النار ويجعل آلامنا مكفرات للخطايا ورفعا للدرجات يارب ..جزاك الله خيرا...تحياتي


تأثير الفراشة

تسلميلي يا نهنوهة يا رافعه من إيجابيتنا دائما عبر كلمات تمضي بنا نحو عالم إسلامي قويم ...تحياتي


مختار

لا عليك يا بني متزعلش ..المهم انت معانا اهو ..بالنسبة للجرائد والأخبار أثبتت فشل ذريع ..كلما قرأت ما ينغص علي كلما انخفض ضغطي ..وعليه قررت أهجر الجرايد كما هجرت التلفزيون من قبل ...تحياتي



ختاما

عذرا لتأخري عليكم ولكن الانترنت عندي كل يومين يصاب بعطل سنترال 72 ساعه وقريبا حاحاول من الشركة إن استمروا على هذا ......نورتونيييييييي

Mohamed E.T يقول...

حمد لله علي السلامة اولا ...لكن الحمد لله القصة مش خطرة و غالبا يكون النوع ال Non-cardiac بفضل الله ..شكل حضرتك عندك ضغوط شوية .حاولي حضرتك ابعدي عن التوتر و اي شئ يجيب توتر و لو حسيتي بالدوخة حاولي حضرتك تنامي و تعملي زي ما وصف الطبيب فعلا بتنفع ان شاء الله و بفضل الله خير ..المرض مش خطير الحمد لله
شفاك الله و عافاك يا رب

كلمات من نور يقول...

محمد آي تي

ابتعد عن الضغوط ...ممممممممممم ...ضع نفسك مكاني أنا عايشة في مصر المحروسة زوجة و أم لأربعة من البنين اكبرهم حيتخرج السنة دي من الجامعة و أصغرهم لسه يادوب في سنة تانية ابتدائي ...أظن كفاية كده..تحياتي و أسأل الله أن يعافيك من كل سوء

قم للمعلم يقول...

اسأل الله العلي العظيم رب العرش الكريم ان يشفيك
والحمد لله على سلامتك
ان شاء الله فكرة التبرع بالأعضاء ماجاتك لأنك يأست من الحياة لازم يكون ايمانك بالله قوي وان شاء الله مثل ماقالوا الاصدقاء الموضوع بسيط
والتبرع بالأعضاء هو فعلا منح حيااااااة
اعانك الله على فعل الخير والصواب
واكرر لا تخاف الأعراض اللي عندك ان شاء الله ازمة ورح تعدي

حنان ورده يقول...

اعتذر تكلمت بصيغة المذكر
تصدقين ما ادري ليش ؟؟
:)) اعتذر فعلا

أ / أحمد عبد المنعم يقول...

بسم الله الرحمن الرحيم

الأخت الفاضلة : نور

نعم قصدت إضحاكك فعلا فالضحك يساعد على ضبط الضغط أيضا .

أما بالنسبة للأطعمة الثلاثة التى ذكرتها فهى رموز للضطراب الإدارى
فالكوسة تعنى المحسوبية
والملوخية تعنى التخريف الإدارى ( لما لها علاقة بقرارات الحاكم بأمر الله )
والباذنجان يعنى الهبل والعته

أما بالنسبة للدوم

فإنه ثابت عندى من مصادرى الطبية الموثوقة- لدى - أنه منظم للضغط عاليه ومنخفضه وهو بذلك يكتسب مزية لا توجد فى غيره من المشروبات على الإطلاق

أما مصدرى الطبى فهو أفضل طبيب صدر فى مصر ( فى نظرى )

وما ذكرته لحضرتك من نصيحة لم يكن بتناوله بل باستشارة طبيبك لتناوله
وبالطبع بينهما فارق كبير جدا فليس من حقى إرشاد أحد إلى ما ليس من تخصصى كما أنه ليس لأحد أن يأخذ بنصائح غير متخصصين خاصة فيما يتعلق بالصحة والدين .

خفف الله عن الجميع و أدخل فى قلوبنا الفرح و السرور وجمّل ذلك كله بسعادة تغمر نفوسنا .

كلمات من نور يقول...

قم للمعلم

أهلا وسهلا بك بين جنبات مدونتي المتواضعة...بالطبع فكرة التبرع بأعضائي لم ترد بسبب مرضي ، حاشا لله ، أنا كلي يقين بالله ربي ولكنني كلما رأيت من يحتاج إلى كلى أو كبد أو الأطفال المصابين بالحروق من الدرجات الاولى كلما أردت أن أساعد في شيء ما عند موتي ...وهو بيد الله لا اعلمه ...شكرا لكو أتمنى دوام التواصل...تحياتي



حنان وردة

لا أدري ما المقصود من كلماتك يا فتاتي ولكن أهلا وسهلا بك بين جنبات المدونة ....و اسأل الله لنا دوام التواصل...تحياتي


أ-أحمد عبد المنعم

طبعا انا عارفه ان كلامك كان هزار أصل الكوسة دي لي فيها باع طويل علشان كده قلتلك أضحك الله سنك ..اما بالنسبة للدوم فأيضا كنت أمزح معك ولكنني في رمضان الماضي شربت كوب من الدوم وشعرت بحالة إغماء وحينما تحدثت إلى طبيبي قال لي أنت صاحبة ضغط منخفض إذن القليل منه متعب لك وكذلك مثلا الشاي الأخضر نصحوني به ويادوب كوب واحد وكانت النتيجة مشرفة وبرضه طبيبي قالي انتي خليكي على جنب وبلاش الأعشاب زي الينسون والكراوية والكاموميل ووو علشان انتي ضغطك عجيب ....تصدق يا أستاذ أحمد أنا لو تقلت في الاكل ضغطي يوطى و بالتالي باكل عدة وجبات صغيرة ...انا بجد تعبتهم معايا كلهم حتى الصغار اعتذرت للمدرسين عن تجليد حاجة بتاعة 120 كراسة وكتاب مش قادرة انحني اجلد ...زورزنا تجدوا ما يسركم ...ملحوظة
ليه حضرتك حارمنا من بوستاتك؟؟
تحياتي

نورتوني

كلمات من نور يقول...

حنان وردة...قم للمعلم

أعتذر لم أكن أعلم سوى الآن أنكم شخص واحد ..سامحيني أخيتي هذه بتلك ... (:

الجواز و سنينه يقول...

الف سلامه عليكى يا جميل
و ربنا يهدى القلب و العقل اللى عملين خناقه جوه دول
انا كمان عندى ضغط وااااااااطى برضوا
بس يادوب باخد ايفورتيل
اظاهر انهم عندى يادوب بيشدوا مع بعض
ههههههههههههه
تقومى لاولادك بألف سلامه و ربنا يديكى الصحه
اسأل الله العظيم رب العرش العظيم ان يشفيكى
بالنسبه للصوره اكون مشكوره جدا لو عملتيها بس لو هاتتعبك بلاش
و شكرا

كلمات من نور يقول...

الجواز وسنينه

شفاك الله وعافاكي من كل سوء....جاري العمل على الصورة

تحياتي

وفاء بركات يقول...

الف مليون حمدلله علي سلامتك...
سمحيني لأنها متأخره لأني أنا الأخرى منقطعه عن التدوين من فتره طويله بسبب أرتفاع السكر مش سعر السكر في السوق لأ إرتفاعه في الدم وأنا عماله أكل وأتنرفز وهو يعلي لغاية معمل لي خراج في بطني والحمد الله علي كل شئ
المهم إنك الآن بخير وربنا يشفي كل مريض