الثلاثاء، 17 نوفمبر، 2009

مقال لمدونة عيون





داه موضوع أخونا ( المهاجر إلى الله ) و أنا أضفت إليه بعض الصور وتعليقي على موضوعه وكل صيام و أنتم بخير..تقبل الله صيامنا وقيامنا و عيد سعيد عليكم جميعا






الاثنين، نوفمبر 16، 2009
ياللا نعلي الهمة عشان نبقى من اصحاب القمة

السلام عليكم ورحمة الله وبركاته:
اقتربت العشرايام من شهر ذى الحجة واصبح يفصلنا عنها سويعات قليلة فهل استعدينا لهم
من فضل الله تعالى على عباده أن جعل لهم مواسم للطاعات، يستكثرون فيها من العمل الصالح، ويتنافسون فيما بقربهم إلى ربهم، والسعيد من اغتنم تلك المواسم، ولم يجعلها تمر عليه مروراً عابراً. ومن هذه المواسم الفاضلة عشر ذي الحجة، وهي أيام شهد لها الرسول بأنها أفضل أيام الدنيا، وحث على العمل الصالح فيها؛ بل إن الله تعالى أقسم بها، وهذا وحده يكفيها شرفاً وفضلاً، إذ العظيم لا يقسم إلا بعظيم.



قال الله تعالى :


{وَالْفَجْرِ (1)وَلَيَالٍ عَشْرٍ (2)وَالشَّفْعِ وَالْوَتْرِ (3)وَاللَّيْلِ إِذَا يَسْرِ (4)هَلْ فِي ذَلِكَ قَسَمٌ لِّذِي حِجْرٍ (5)}


[الفجر:1-5]،




عن ابن عباس عن النبي صلى الله عليه وسلم أنه قال «ما العمل في أيام أفضل منها في هذه، قالوا ولا الجهاد؟ قال ولا الجهاد، إلا رجل خرج يخاطر بنفسه وماله فلم يرجع بشيء» البخاري .




وهذا يستدعي من العبد أن يجتهد فيها، ويكثر من الأعمال الصالحة، وأن يحسن استقبالها واغتنامها
......................


يعنى من الاخر كده هما عشر ايام مش بتكرروا غير مرة واحده فى السنه ، وتخيلوا بقى ان اى عمل صالح فى الايام المفترجة دى بيبقى افضل عند الله من انك تخرج تجاهد فى سبيله الا قط عندما تضحى بمالك وبروحك فى سبيله ولا تعود بشىء منهما ، يعنى تروح ومترجعش هو ده بس العمل المفضل على اى عمل اخر فى الايام العشرة دى .
شوفتوا فضل ربنا كبير قوى علينا ازاى ، يعنى انت وانت قاعد فى بيتكم تحت التكييف ممكن قوى تعمل حاجة تكون افضل من بذل الجهد فى سبيل الله .
زى الاستغفار ، زى الحمد والشكر لله، زى الحوقلة او التكبير او التهليل .
حاجات بسيطة لها فوائد عظيمة فى اى وقت كان فمابالنا بقى بالايام العشرة دى .
بس احنا المفروض همتنا تبقى اعلى من كده ، ماهو بردو مهما كانت الاذكار دى لها فوائد عظيمة بس هيه لوحدها مش كفاية
عشان كده لازم نكون اصحاب همة عاليه .
وعشان كده بردو انا بقترح برنامج نتعاهد اننا ان شاء الله ننفذه قدر استطاعتنا فى الايام العشرة الجميلة دى .

البرنامج اسمه
عللى الهمة عشان تكون من اصحاب القمة
شروط البرنامج
الوصول للقمة فى الاسلام امر سهل وبسيط ومش محتاج للتعقيد ، يكفى اخلاص النية وديمومة العمل ومش مهم بعد كده هوه قليل وللا كتير، ليه بقى لان ربنا سبحانه وتعالى يحب العمل الدائم ولو قليل عن العمل المتقطع ولو كثير .
يبقى اول حاجة اخلاص النية وتجديدها
تانى حاجة تنويع النية وتعديدها ، يعنى انوى فى قريرة نسك انك لما بتعمل عمل صالح بتعمله عشان ترضى الله ، عشان تساع مسلم اخ لك فى الله ، عشان تمنع معصية ممكن تحصل وهكذا
تالت حاجة العزيمة ، مهم قوى يكون عندك عزيمة وارادة وتصميم انك تحقق لنفسك منزلة عند الله سبحانه وتعالى ، وفى ذلك فليتنافس المتنافسون .

نييجى بقى للبرنامج نفسه
البرنامج الزمنى للعشرة ايام بسيط وظريف وطعم ولذيذ ومش محتاج لوقت كتير ولا لمجهود كبير

1- الصيام ، انت فى بيتك ومش بتحج ولا بتحارب وللا حاجة يعنى فيها ايه لو صومت العشرة ايام دى
عشر تيام هيعدوا هوا ، ومش هيرجعوا تانى الا فى السنة اللى جاية ويا عالم مين هيبقى عايش ومين هايبقى مات . وياعالم لو عشنا حتى للسنة الى جاية هنبقى بنفس الصحة والحيوية دى وللا هيبقى نفسنا نصوم العشر تيام ومش قادرين ونندم وقتها على اللى فات
طب ليه نعرض نفسنا للندم بقى ما الموضوع فى ايدينا اهو ومش هانموت من الصيا م( محدش بيموت من الصيام ).
......................
2- ختم القرآ الكريم ، كلنا يعرف طبعا ان القرآن الكريم مكون من تلاتين جزء ، يعنى لو كل يوم قرأنا تلات اجزاء يبقى هنختم القرآن ان شاء الله فى العشرة ايام دى . يبقى اول حاجة ختم القرآن الكريم ، ومش كروته بقى خليك حلو عشان احبك ، اقرأ بتدبر وتمعن ، المسالة دى هتاخد منك وقت قد ايه ، بالظبط كده لو قريت تلات اجزاء بتدبر وتمعن هياخد منك ساعه ونصف وبالكتير خالص ساعتين ، من اربع وعشرين ساعة يابلاش ، وطبعا انا مش محتاج ولا بصدد انى اقولكم فضل قرأة القران فى اى يوم تانى فمابال الايام العشرة بقى، وبعدين المفروض ان المسلم يختم القران مرة كل تلات ايام ولو مقدرش يبقى مرة كل عشرة ايام ولو مقدرش يبقى مرة كل تلاتين يوم ولو مقدرش مايفوتش عليك اربعين يوم من غير ماتكون ختمته مرة ، يعنى مسموح لك انك تختمة مرة كل اربعين يوم .
........................
3- الحديث الشريف ، هوة فيه يا جماعة مالنا كده مهملين فى دراسة وتعلم الحديث الشريف ، انتو مش عارفين فضل دارس الحديث ومتعلمه ومكانته عند المولى سبحانه وتعالى عظيمة قد ايه ، ومش عارفين كمان ان الحديث الشريف مهم قوى لحياتنا لانه هوه اللى بينور طريقنا ، لانه شارح للقرآن الكريم وموضح لما فيه من معانى واحكام ودرر وكنوز اعجازية . ومن غير الحديث الشريف مش هانقدر نفهم القرآن خالص .
الحديث الشريف اكتر من مليوووووووون حديث بكتير قوى ، انا طبعا مش باقولك فى خلال العشرة ايام دول احفظ المليون وادرسهم وتبحر فيهم ، لاء كفاية عليك قوى الاربعين النووية ، ليه بالذات اختارت لك الاربعين النووية ، ايوه قلتى ليه
شوف ياسيدى كتاب الاربعين النووية للإمام محيي الدين أبي زكريا يحيى بن شرف النووي رحمه الله نقدمها للقراء ولطلبة العلم في كل مكان لنفاستها وجمعها للكثير من خصال الخير، ففيها من أحاديث الجهاد والزهد والآداب التي يجب أن يتخلق بها المسلم، وكل حديث منها قاعدة عظيمة. عرفت بقى ، كل حديث عبارة عن قاعدة دينية فقهية من قواعد هذا الدين ، والحق يقال فان الامام النووى رحمه الله بذل جهدا خارقا لجمع وتصنيف هذه الدرر النبوية النووية . ليقدمها لنا غضة طرية .
كل يوم احفظ خمس احاديث وادرسهم كويس هياخدوا منك وقت قد ايه هما بالكتير خالص تلات ساعات ولو كترت شوية يبقى تلات ساعات ونص ، مش بيضيعهم دول قدام مبارة لكرة القدم او فيلم او مسلسل او قدام النت وعلى فكرة لو قدرت تعملها وتحفظ الربعين النووية وتبقى طليق فيهم دراسة وعلما يمكن الشيخ ابو اسحق الحوينى يخليك تقول خطبة الجمعة فى مسجد شيخ الاسلام بن تيمية عندنا فى كفر الشيخ وياسلاااااااام بقى تبقى عشرة على عشرة لو قدرت تحفظ عمدة الاحكام بالمرة ، وده عبارة عن تلتمييت حديث بس ، .يبقى تلات ساعات ونص للحديث مع ساعتين للقرآن الكريم يبقوا خمس ساعات ونص وبس يابلاش. بنضيع اكتر منهم قدام النت .
.........................................
4-بعد كده بقى مفيش هاتخد وقت ، انت كل يوم هتطلع صدقة على حسب مقدرتك ،
وبعدين تلزم الاذكار طول الايام العشرة دى ومن اهم الاذكار اللى عايزك تلزمهم اذكار الاستغفار ، ياااااااااااااه ، اسئلو مجرب يا اخونا ، انا عن نفسى والله العظيم حياتى اتحسنت كتيييييييييير قوى بعد مابقيت الزم الاستغفار ، وانا فى القطر او فى الباص او فى العربية او فى التاكسى وانا ماشى فى الشارع او قبل النوم او بعد النوم او فى وقت او على اى هيئة وباى لفظ سواء كنت متوضى وللا لاء ، صدقونى والله بدات احس فعلا برضا ربنا عليا وبحلاوة الحياة بعد ما لزمت الاستغفار .
وخير لفظ للاستغفار هو دعاء سيد الاستغفار
( اللهم انت ربى لا اله الا انت ، خلقتنى وانا عبدك ، وانا على عهدك ووعدك ماستطعت ، اعوذ بك من شر ما صنعت وابوء لك بنعمتك على وابوء بذنبى فاغفر لى فانه لا يغفر الذنوب الا انت )
دعاء بسيط وسهل وممكن تكرره على لسانك وترطب بيه على قلبك كل يوم اكتر من خمسمية مرة (500) يعنى خمسة فى عين العدو وجنبها صفرين على اليمين مش الشمال هاه لو مش هاتقدر يبقى مش شرط بلفظ سيد الاستغفار يكفى( اللهم اغفر لى ) او (استغفر الله) وكده يعنى ، بس انا عارف انك هاتقدر على الاقل تقول ( اللهم لا اله الا انت استغفرك واتوب اليك ) على الاقل خالص 200 مرة فى اليوم ، طب ماتزعلش كفاية 100 مرة ومش اقل من كده بقى امال فين العزيمة .
........................
بس كده خلص البرنامج هنركز فى الاربع نقط دى وبس ومش مهم اى حاجة تانية دلوقت واللى شايف فى نفسة القدرة على انه يعمل اكتر من كده يبقى تمام قوى وربنا يبارك فيه ويعزه لكن ماتعملش اقل من كده .
1- الصيام ، 2- ختم القرآن ، 3- حفظ ودراسة الاربعين النووية ، 4- صدقة سر ميسرة كل يوم مع لزوم الاستغفار .
وعلى فكرة الاربعين النووية متوفر بسعر زهيد جدا فى المكتبات الاسلامية المنتشرة فى كل مكان مع الشروح الخاصة به ،وانصح ان تقتنوه بشرح الشيخ العلامة بن عثيمين رحمه الله.
نتواعد ونتعاهد ان ان شاء الله نكون على قلب رجل واحد فى تنفيذ البرنامج السهل ده على قدر المستطاع ، واننا نتنافس فى تنفيذه على قدر المستطاع ، وان شاء الله ربنا يلمس بقلوبنا الاخلاص فهيكرمنا ان شاء الله واللى شايفنه انه ممكن يكون صعب دلوقتى بمجرد ما نبدأ فيه ونسأل الله المعونة هنلاقيه سهل قوى وهنبقى مش عايزيين نبطله .
واتفرج على نفسك بقى بعد العشر ايام دول لما يخلصوا وتكون نفذت البرناج البسيط ده ، هتلاقى نفسك باذن الله انسان تانى خالص ومقبل على الحياه بايجابية وفاعلية المسلم .
وفى النهاية ياريت لو تعيدوا نشر هذا البوست فى مدوناتكم لينتشر الهدف منه و لتعم الفائدة وكمان هتبقى فى ميزان حسناتك ا ن شاء الله.
اراكم بعد العشرة ايام ان شاء الله .
تحياتى


*******************





كلمات من نور يقول...

جزاك الله خيرا
ووفقنا الله لصيام العشر من ذي الحجة

أنصح نفسي و إياكم بالسماع إلى درس الدكتور راغب السرجاني ، بارك الله فيه ، والدرس على طريق الإسلام بعنوان:

الحج ليس للحجاج فقط

http://www.islamway.com/?iw_s=Lesson&iw_a=view&lesson_id=27818


ساهم في نشر الموضوع و لك جزيل الشكر!



Digg Technorati del.icio.us Stumbleupon Reddit Facebook Twitter

احصل على هذه الإضافة

هناك 10 تعليقات:

د. ياسر عمر عبد الفتاح يقول...

جزاكِ الله خيراً
وجزاه الله خيراً كثيراً طيباً مباركاً فيه

بجد جدول ولا أروع
بس محتاج واحد فاضي شوية
ربنا يقدرنا ونتابع معاه

كلمات من نور يقول...

تقدر يا ياسر تاخد من الجدول ما تستطيعه ولا تنسى أن أفضل الذكر هو كتاب الله ؟...ضع المصحف على موبايلك ..أنا عامله كده بحيث إني في كل مرة بامسك الموبايل و أنا بره البيت أو جوا البيت وقت الصلاة وقبل النوم وفي التاكسي وكل مكان أقرأ القرآن ...ربي يقدرك ويوفقك لما يحب ويرضى

كلمات من نور يقول...

الأربعون النووية شرح الشيخ ابن عثيمين رحمه الله:


http://www.lakii.com/vb/archive/index.php/t-95736.html

كلمات من نور يقول...

ومن أجمل الآيات التي قرأتها في سورة الحج آية رقم 37 :

لَنْ يَنَالَ اللَّهَ لُحُومُهَا وَلَا دِمَاؤُهَا وَلَٰكِنْ يَنَالُهُ التَّقْوَىٰ مِنْكُمْ ۚ كَذَٰلِكَ سَخَّرَهَا لَكُمْ لِتُكَبِّرُوا اللَّهَ عَلَىٰ مَا هَدَاكُمْ ۗ وَبَشِّرِ الْمُحْسِنِينَ (37)

يا الله آية تجعلني أقرؤها مرة بعد مرة كلما قرأت سورة الحج و أقول صدق ربي العظيم الأضحية تقوى ليست لحم ودماء بل هي سبب للإحسان وتقوى الله...كتب اللهم لكم التقوى و جعلنا و إياكم من الصالحين الأتقياء

الفقيرة إلى الله أم البنات يقول...

جزاك الله خير يانو انت وطارق وكل من يذكرنا
ربنا يجعله فى موازين حسناتكم

ان شاء الله انظر ما استطيع عمله

كلمات من نور يقول...

أهدتني أم البنات موقع به مقال جميل أيضا عن فضل ال10 من ذي الحجة ...


http://www.manhag.net/mam/mqalat-zwa-alhjh/brnamj-eymany-lehyaa-23zm-2yam-aldhr.html

فشكووول يقول...

ازيك يا صاحبة النور

كل سنه وانت طيبه .. كل سنه وانت فى طاعة الله.

انا الان قاعد متوتر بالرغم من ان فاضل على الماتش ساعه لكنى متوتر ولست واثقا من اى شيئ بعكس كل المصريين

Dr Ibrahim يقول...

جزاكم الله كل خير لدى ايضاً مقال ليال عشر هنا
مرتبط بنفس الموضوع
وكل سنة وانتم طيبين

كلمات من نور يقول...

أهلا دكتور إبراهيم

نورتنا وفعلا موضوع دكتور إبراهيم ضمن موضوعنا عن العشر من ذو الحجة وياريت نقراه ونشوف مدونة دكتور إبراهيم وهي مدونة هامة للصحة العامة:

http://mar7om.blogspot.com/2008/11/blog-post_30.html

كلمات من نور يقول...

فشـــكوول

لله الأمر من قبل ومن بعد ..بس صدقني إحنا المرة دي سبب الهزيمة لما الاقي مجموعة تقول يلا يا جماعة نصوم يوم الكذا بنية فوز منتخبنا وجماعة تانية تقول نقوم كلنا نصلي الفجر جماعة يوم الأربعاء علشان النصر وواحد تالت يكتب والنبي والنبي، حد لسه بيحلف بالنبي يا عالم ، طلعوا صدقة جنية واحد قبل الماتش علشان النصر........مالكم لا ترجون لله وقارا؟؟؟؟؟؟؟؟؟؟؟؟؟؟؟