الأربعاء، 15 يوليو، 2009

حملة على دولابي قبل رمضان






حملة على دواليبنا قبل رمضان, رتبي دولابك

رمضان أقبل و أهل علينا ...يجعل كل أيامه قرآن وإيمان وصلاة وقيام لينا ولأمة محمد أجمعين

قبل رمضان والهمم كده عاليه وحلوة إيه رأيكم نعمل شيء لله؟





أنا الفترة اللي فاتت بأمانه عملت حملة لدواليب ناس كتير

وطبعا بدأت بنفسي

كل ما ألبس عبايه حلوة جديده أقول سبحان الله شوفي كام عبايه عندك؟ وشوفي كام بنت بيروحوا الجامعه بعبايه واحده طول السنه؟



وشوفي كام عروسة يتيمه قلبها مكسور وجهازها فقير و مش قادرة؟

وبدأت أسأل نفسي بيعدي الشتا عليا ومع حبس المدارس والدروس والشتا بانزل كام مرة؟ باحتاج كام عبايه؟
حتى في الصيف بانزل كام مرة وكام مرة أكسل والبس نفس العباية مرتين وتلاته ورا بعض؟؟؟

وفعلا قمت لدولابي وعملت غزو هائل ولقيت النتيجة مخيبة للآمال :

لقيت قميص نوم ليلة زفافي الأبيض ولونه بدأ يفقد اللون و قرب من الأصفر ..محتفظه بيه ليه؟ الذكريات الحلوة في القلب وبس

وديته لمحل الدراي كلين و قمت بسرعه كلمت صديقة لي عندها جمعية بالقاهرة وقلتلها إيه رأيك نعمل حاجه حلوة

قالتلي خير ؟ قلتلها أنا عملت حملة على دولابي ولقيت حاجات أساسا كنت نسيتها ووديتها كلها للتنظيف والرفا و ووو و لفيتها و حابعتهالك بشركة الشحن

قالتلي الله عندي يتيمات محتاجين يتجوزوا ومحتاجه حاجات كتير

قلتلها : على الخير يارب

وفعلا في نفس اللحظه حطيت كل الحاجه في صندوق نظيف وكتبت عليه بيانات صديقتي و بعته مع ابني لشركة الشحن ووصلها تاني يوم الصبح القاهرة وبعتتلي ان الحاجه تمام

من يومها وأنا مش سايبه حد بصراحه كل فترة كده أسأل صديقه أو خاله أو قريبة : رتبتي دولابك السنه دي؟؟؟؟؟؟؟؟؟ تقولي اه طلعت الشتوي ودخلت الصيفي

أقولها لا انا باتكلم عن ترتيب تاني خالص .................وفعلا يومين والاقيها تقولي عنوان الجمعية إيه ؟ أو يكون عندها ناس هي شايفه إنهم يستحقوا الملابس دي

على فكرة أنا بقيت باعمل كده مع أولادي و أخليهم بنفسهم يعملوا كده و يعرفوا حاجاتهم حتروح لمين

إيه رأيكم؟

حترتبوا دولابكم قبل رمضان؟ متنسوش حاجه مهمه قوي ...أي قطعة ملابس عروسة حتلبسها أو طالبة جامعيه أو طالب جامعي .. أصل الكلام مش للنساء فقط ..داه للنساء والرجال و الأطفال ....مع كل فرحة من أي واحد فيهم بقطعة ملابس حيكون ليكم أجر وثواب

ألبسكم الله من حرير وحلي الجنة وبارك لكم في أعمالكم في رمضان و طول العام


-------------------------------------

تعقيب

أشهد الله قبلكم جميعا أني ما كتبت هذا المقال رياء ولا تفاخرا بل أحببت أن أشارك معكم في ثواب بسيط عل الله يقبله منا ويبيعنا سلعته الغالية : الجنة

جعلني و إياكم من فاعلي الخير والمشاركين فيه طلبا للفوز بالجنة والنجارة من النار


--------------------

يا نور على نور : اجعل في قلبي نور ، اجعل في سمعي نور ،اجعل في عيني نور، اجعل كلامي نور، واحميني من نفسي
ساهم في نشر الموضوع و لك جزيل الشكر!



Digg Technorati del.icio.us Stumbleupon Reddit Facebook Twitter

احصل على هذه الإضافة

هناك 35 تعليقًا:

بدراوى يقول...

جميل اوووووى الكلام ده و التجربة ديه
اللى بتعملها برده جمعية رسالة للخير
ربنا يزيدك من فضله
و يكرمك
البوست من افضل البوستات اللى حضرتك كتبتيها بجد

الفقيرة إلى الله أم البنات يقول...

حبيبتى الغاليه..من يعرفك لا يستبعد هذا
وذكر ان الذكرى تنفع المؤمنين
ربنا يجعلنا من الذين اذا اعطوا احسنوا..واذا انفقوا لم يقتروا..واذا ساعدوا لا يمنوا
ربنا يسعدك فى الدارين يانو..والله احسبك على خير ولا ازكيك على الله..والحمد لله الحملات مستمره..ولكن لرمضان عبق ومعنى آخر ربنا يبلغنا جميعا رمضان ولا يحرمنا أجره

كما انت تفعلى ويفعل عباد الله المخلصين واحسبكم على خير
منذ شهر ايضا يفعل اعوان الشيطان ويجهزا الناس ليبتعدوا عن الله فى رمضان..كم هائل من الاعلانات عن برامج رمضان..عافانا الله واياكم من اعوان الشيطان
ورزقنا من يذكرنا مثلك يا غاليه
نو احبك فى الله

mohamed ghalia يقول...

بجد فكرة حلوة أوى
ربنا يكرمك ويجعله فى ميزان حسناتك

كلمات من نور يقول...

بدراوي

شكرا لك ولردك ومدحك اللي لا استحقه والله يا بني الواحد نازل قبره بأعماله بس لا لبسه ولا جواهره ولا حساب البنك حينفعه

شكرا لك مرة تانية...نورت مدونتي المنورة بيكم

كلمات من نور يقول...

أم البنات


أحبك الذي أحببتني من أجله

أنا كمان بحبك قوي في الله وباسأل ربنا يحقق حلمي ويجمعنا في جناته متجاورات وينعم علينا برؤية وجهه الكريم

مافيش هنا صور ورود كنت حطيت ليكي باقة ورد تعبر عن حبي لك وامتنانـــــــي

موآآآآآآآآآآآآآآآآآآآآآه

جحا المصرى يقول...

ربنا يجازيكى كل خير على الفكرة

فشكووول يقول...

يا صاحبة النور
السلام عليكم

نصائح غاليه وثمينه وتنبيه اثمن
الدواليب مليانه حاجات كتيره ما لهاش لازمه واحنا مش عارف ليه متمسكين بيها

العام الماضى واقوله من باب وفى ذلك فليتنافس المتنافسون اخرجت ما فى الدولاب من ملابس جديده قبل القديمه وتبرعت بها لاحدى الجمعيات وان شاء الله السنه دى افعل
بارك الله فيك
تحياتى

كلمات من نور يقول...

محمد غالية

يلا شد الهمة ووريني دولابك علشان تبقى حسنات جماعية رمضانية ...ربي يتقبلها منا خالصة لوجهه الكريم





جحا المصري

جزاك الله خيرا أنت أيضا و شكرا لمرورك




فشكوول

وعليك سلام ربي ورحمته وبركاته

ما شاء الله ... أيوه كده هي دي همة المسلم العالية

من يشتري الجنة؟؟؟فمن أجلها حقا يتنافس المتنافسون

جعلنا الله من أهلها فهو القادر على ذلك

ماما أمولة يقول...

فكرة هايلة ربنا يجعلها في ميزان حسناتك

تشرفت بزيارتك للزمن الجميل

وكل كلماتي تحت امرك

وسلامة ابنك الف سلامة اللهم امين

شكرا لزيارتك الجميلة دمت بكل الخير

كلمات من نور يقول...

ماما أمولة

ربي يبارك فيكي وفي كلماتك ويجعل الصلاح فينا و في أبناؤنا وبناتنا آجمعين ..تسلميلي يارب

المجاهد الصغير يقول...

السلام عليكم ورحمه الله وبركاته
جزاكِ الله خيراموضوع مهم جعله الله فى ميزان حسناتك
دمتى بكل خير

موناليزا يقول...

ربنا يعزك يارب ويجعل هذا الموضوع فى ميزان حسناتك

بنوته صغيورة يقول...

نووووووووووو
جزاك الله خيرا على التنبيه ده
و كمان جزالك الله الف خير عنا فى كل اللى هانعمله انتى كده ما شاء الله مش بقر ولا بحسد واخدة حسنات كل اللى هايعمل زيك بارك الله فيكى يا رب و رزقك من اوسع الابزازب
انا بقى الحمد لله بطلع الهدوم اول باول (طبعا ماما اللى بتقولى)
بس انا قى عايزة اعمل حملة على الجزم انا عندى كام جزمة مش بلبسهم عايزة اوزعهم و اهو اخد ثواب
انا بحبك فى الله

كلمات من نور يقول...

المجاهد الصغير

شكرا لمرورك الطيب وتعليقك

جزاك الله خيرا وجعل كا أعمالنا خالصة لوجه الله لا رياء فيها أبدا .

كلمات من نور يقول...

يلا يا رووووو شدي الهمة انتي و أخواتك و أصحابك وكل اللي تعرفيهم ...داه رمضان يا قمر شهر الصدقات و الأحسان وربي يجازيكي بالإحسان إحسانا كما قال في كتابه الكريم

بحبك يا أغلى روووو

جارة القمر يقول...

ربنا يكرمك ويقدرك على فعل الخير


بارك الله فيك وجزاكي كل الخير

مودتي

كلمات من نور يقول...

جارة القمر

شكرا لمرورك وربي يتقبل منا ومنكم دوما الأعمال الصالحة ويدخلنا جناته مع النبيين والشهداء والصديقين وحسن أولئك رفيقا

كلمات من نور يقول...

موناليزا معلش يا قمر مدونتي على رأيي أنا و أم البنات عليها عفريت

لسه شايفه تعليقك ولما مررته لقيته نزل في مكان قبل عدة أشخاص ومش عارفه ازاي

بس معلش المهم العفريت ميخربهاش خالص

بارك الله فيكي وشكرا لمرورك

akeed يقول...

هذا من اجمل ما سمعت لاكتساب الثواب خاصة هذه الايام قبل شهر رمضان وهو التصدق وانك قد ذكرتينا بهذا الامر الهام جميعنا نمتلك ملابس جيدة و لا نلبسها و مغلقين عليها الدواليب و لاكن بطريقتك تكون صدقة جارية .

جعله الله فى ميزان حسناتك

دعوة لاكتساب حسنات ايضاً ادخلى مدونتى و انسخى المسابقة الموجودة فيها و اعطيها للأهل والاصدقاء و الاقارب للبحقث عن الحلول خلال هذا الشهر قبل رمضان لتكون فى ميزان حسناتك ايضاً ونشرها ايضاً بين المدونين

عمرو يقول...

بارك الله فيكى و يجعله فى ميزان حسناتك اٍن شاء الله ..
ربنا يجازيكى خير للتذكره ..
تقبلى تحياتى و دعائى و تقديرى ..

norahaty يقول...

السلام عليكم ورحمة الله تعالى وبركاته
(رزقك الله الجنة)كانت اول ما تبادر
الى ذهنى بعد ان قرأت هذه الفكرة
والعمل الجميل .رزقنا الله واياكى
الجنـــــــــــــــــــــــــة

أم مالك يقول...

اختى كلمات من نور
كيف حالك يارب بالف خير
عجبتنى قوى الفكرة والحمد لله احنا دايا بنعملها
وانا دعوت لقراءة هذا البوست فى بوستى الاخير
جعل الله التذكرة فى ميزان حسناتك
دمتى بخير

عالم حبيب يقول...

ما شاء الله فكرة جميلة ربنا يتقبلها ويجعل الجميع يقتدي بيها وتاخدي الثواب ان شاء الله

رحلة البحث عن الوطن المفقود يقول...

ربنا يكرمك ويتقبل منك

مامة مازن يقول...

ربنا يبارك لك يارب فكرتينى بمامتى هى دائما تعمل كده كانت بتشوف الاقارب الاول لو حد يلزمه شىء وبعدين اى حد جار محتاج واللا حاجة وكبرنا على كده وبقى طبع فينا اننا منكنزش الحاجات الثواب اللى هيجيلنا من وراها احسن بكتيييييييييييير من كنزها وتخبيتها
طب للافادة (جمعية رسالة ) هى ليها فروع كتير جدا على مستوى الجمهورية وبتاخد الملابس دى بتوضبها وكده وممكن ييجوا هما لعنوانك لاخذها وساعات بيعملوا معارض فى القرى القطعة مثلا بجنيه او اتنين ولو طلع فلوس بيعملوا بيها حاجة تانية.
اشكرك جدا لانك زى جرس تنبيه جمب ودنى وقلبى.

Mona يقول...

أنت عارفة زمان كنا ننكت الدولاب ونحط الهدوم كلها ونديها للست الى بتساعدنا فى البيت أو البواب حتى حتلاقى ده كان شىء أساسى فى بيوت كتيرة من سنوات والله مش قليلة حتى أمهاتنا كانوا بيعملوا كده دلوقت بوجود جمعيات كتيرة الحمدلله التفكير ده أتغير زى ما صديق قال فيه رسالة وفيه كمان مساعدة وديه برضة جمعية رئيستها صديقة لى وزى ما أنت بتقولى بنلاقى ناس كتير من القرايب محتاجين حتى أصدقاء برضة ممكن نوفر لهم لو محتاجين حاجة أنا كنت كمان سمعت فى برنامج دينى أنه ياسلام كمان لو تصدقنا بلبس جديد ونكون بنحبه يعنى متعلقين به ونكون لسة محتاجينه طبعا ده محتاج جهد وجهاد كبير من النفس ربنا يقدر الجميع وكلنا نذكر بعض فى الايام المفترجة ديه - يااااه رد طويل اوى!!! أسفة للتطويل

كلمات من نور يقول...

أكيـــد

عمـــــرو

نورهاتـــــي

أم مالـــك

عالم حبيـــب

رحلة البحث عن الوطن المفقــــــــود

و أخيرا مسك الختام

مامة مــازن


سامحوني عالرد الجماعي بس أنا في المصيف لغاية 30 -7 يعني خلاص يومين و أرجعلكم إن شاء الله ..وحشتني مدونتـي ووحشتني مدوناتكم جميعا....بأمانة أحلى حاجه في الدنيا كرسي أدام البحر بس بعيد شويتين عن البحر علشان المناظر الآدمية التي تؤذي العين ....الله عالغروب على شط إسكندرية...أراكم قريبا..بارك الله فيكم وجزاكم عني كل خير

كلمات من نور يقول...

حبيبتي في الله منى

رد جميل مش طويل أبدا وربي يبارك في الجميع ويقدر يكسر حتة حب الحياة والدنيا فكل هذا زائل والباقي هو أعمالنا الصالحة نقابل بيها ربنا الكريم....تسلم إيديكي يا منى وبأمر الله حاشوف الموضوع اللي كتبتيلي عنه بس بكرة أو بعده علشان غالبا النهارده أخر يوم لنا في المصيف

تحياتي من المنتزة

فشكووول يقول...

يا صاحبة النور

ابنى قعد مستنى الشغل فتره كبيره وهو دكتور ايضا وربنا كرمه واشتغل فى شركة ادويه ... ما هو اللى بيدوه لهم فى المستشفيات يا دوب على قد اكل الكلب اللى مدوخ الشارع بتاعنا

ابن خالتك بقى الله يعينه دا لو شغلوه وعايز كمان معيد ... اذا كنتم من اصحاب الحيثيه .... ممكن اما اذا لم تكونوا قولى له روح العب فى الحاره يا شاطر

انا ابن اختى كان بيطلع كل سنه الاول على دفعته فى كليه الهندسه...

السنه دى بقى بالذات وعشان فيه بنت استاذ فى الكليه معاهم فى الدفعه طلع التانى وهى الاولىىىىىىىىىىىىىىىىىىىىىىى ... انا عايز اصوت زى النسوان واقول يا دهوتىىىىىىىىىىىىىىىى

كلمات من نور يقول...
أزال المؤلف هذا التعليق.
كلمات من نور يقول...

فشكوول باشا

يعني إيه من أصحاب الحيثية؟ لا إحنا معانا ربنا لا بتوع الباشا ولا المعلم ولا البيه الكبير

وهو الله يعينه في بلادنا الجميلة .ابنك اتظلم وبرضه عندنا في مصر داه عادي..و بالنسبة لابن أختك برضه أقول الله يعينه ويعين أهله أصل الكوسة دي على رأي من قال؟:

يا بلدنا يا جميلة فيكي حاجة محيراني نزرع القمح في سنين نحصد الكوسة في ثواني

لا داعي للصويت ما حضرتك مهما صوت وقلت آه يا نيييي محدش بيسمع

تحياتي

د. ياسر عمر عبد الفتاح يقول...

ربنا يزقك الإخلاص في القول والعمل
ويجعل عملك في ميزان حسناتك

ياريت كلنا نفكر كده

كلمات من نور يقول...

ولدي الدكتور ياسر

ربي يرزقنا الإخلاص دائما ويبارك فيك

نورتني

مجداوية يقول...

السلام عليكم
فكرة جميلة لكن ياريت تنبهي إن الأشياء المرسلة تكون مما نحب والأشياء المستهلكة يمكن بيعها وبثمنها نشتري أشياء جديدة وجمعية رسالة بتقوم بهذا الدور فهي تأخذ كل شىء حتى الزجاجات الفارغة والكتب القديمة والملابس القديمة ,,أما ان كانت لأفراد معينين فيا ليتنا نراعي أن تكون مما نحب

وجزاكي الله خيرا كثيرا

كلمات من نور يقول...

مجداوية

بارك الله فيكي والحمدلله ما تقولينه يحدث بالفعل فمن يتصدق يتصدق بأحسن ما عنده...لنا جارة في بيت والدتي كانت تجلس مع بداية الصيف والشتاء تقوم بفرز الملابس وكيها و خياطة أي جزء ممزق أو زر ناقص وووو وكانت تقول لابد من اعطاء الناس ما تحبي أنتي وليس فضلات وبواقي و أشياء لا نحبها

ربي يبارك فيها أعطتني درس قيم منذ سنوات طوال

أما بالنسبة للجمعيات فهي كثيرة لله الحمد وفي القاهرة توجد جمعية أم القرى وصديقتي تشارك فيها ولا أزكي على الله أحد أحسبهم على خير جميعا

جزاك الله خيرا يا سيدتي